ད་ལྟ་ཁྱེད་ཀྱི་གནས་ཡུལ་ནི། - ཙོང་ཆུའི་དྲ་བ། >> བསླབ་བྱ། >> སྡུག་ཡོང་གིན་ཡོང་གིན་སུན་སྣང་མེད།

སྡུག་ཡོང་གིན་ཡོང་གིན་སུན་སྣང་མེད།

[རྩོམ་གྱི་ཡོང་ཁུངས། ཙོང་ཆུའི་དྲ་བ།] [རྩོམ་པ་པོ། ཞང་བཙུན་བསྟན་པ་རྒྱ་མཚོ།] [ཟླ་ཚེས། 11-04-15] [ཀློག་གྲངས། ]

ཕོ་བློ་ཁོག་ཅན་གྱི་བུ་རྒོད་པོ། །ནོར་སྡུག་གསོག་མུག་གསོག་གང་དུས་མེད། ། 

ས་འོག་གི་བྱི་ལོང་མཆུ་དམར་དེ། ། ས་འབུར་རེ་འབུར་རེ་འདུག་དུས་མེད། །
     ཕོ་རྒོད་པོ་ཚོང་ཁེ་བུན་ལོན་ཅན། ། འདང་སྟོང་བ་བརྒྱབ་ནས་གཉིད་དུས་མེད། །
               འཇའ་འཛིན་འདོད་བྱིས་པ་བསམ་མེད་པོ། ། དབུགས་ཐེར་རེ་ཐེར་རེ་འདུག་དུས་མེད། །
          མིང་བླ་མ་ཆེན་པོའི་གྲགས་པ་ཅན། ། ཐུགས་ཤི་སྔས་གཏད་པས་བཞུགས་དུས་མེད། །
  མཐོ་དགུང་སྔོན་བསྟོད་པའི་བྱ་རྒོད་དེ། །      ཁོ་ལྷབ་བེ་ལྷབ་བེ་རོ་ལ་འཁོར། ། 
    ཟས་དཀོར་ཟས་འཚོལ་བའི་གྲོང་ཆོག་པ། ། ཁ་ལག་པ་གཉིས་ཀ་དལ་དུས་མེད། །
 ས་རི་བྲག་དཀྱིལ་གྱི་བྲ་ཙིག་དེ། །                མཆུ་མོ་རེ་མོ་རེ་དལ་དུས་མེད། ། 
    གནས་རི་ཁྲོད་འགྲིམ་པའི་སྒོམ་ཆེན་པ། ། གྲོང་ཁྱིམ་སྒོ་ཉུལ་ནས་ནས་སྤར་འཐུ། །
       ཉིན་ལུང་སྟོང་འགྲིམ་པའི་སྤྱང་ལྟོགས་དེ། ། མཚན་ཀུག་གེ་ཀུག་གེ་རུ་མཐའ་ཉུལ། །
       མི་དགོས་འདོད་མཐོ་འདོད་ཆེན་པོ་ཚོ། ། སྡུག་ཡོང་གིན་ཡོང་གིན་སུན་སྣང་མེད། །
 

གང་འཇམ་གང་ལེགས་བཤད་ཚད་བསམ་དཀར་མིན།

གང་འཇམ་གང་ལེགས་བཤད་ཚད་བསམ་དཀར་མིན། །
ཁ་འཇམ་ཁོག་རྩུབ་ཕྱོགས་ལ་གཟབ་པར་འཚལ། །        
 སྐྱོན་མཚང་བྲུས་ནས་བཤད་པ་བསམ་དཀར་རྟགས། །   
 རང་གི་ཁོང་ཁྲོའི་ཕྱོགས་ལ་གཟབ་པར་འཚལ། །           

གཞན་ལ་གཡོ་སྒྱུས་མགོ་བསྐོར་ཐུབ་ན་ཡང་། །           
ཉིན་གཅིག་ལེ་ལན་རང་ལ་འཁོར་ནས་ཡོང་། །           
སྐྲག་རྒྱུ་མེད་པ་དཔའ་བོ་ལོས་ཡིན་ཀྱང་། །                
ཚམ་ཚོམ་མེད་པ་ཕྱེ་ལེབ་མེ་ལྕེབ་འདྲ ། །                   

 

དཔྱད་གཏམ།

དཔྱད་གཏམ་སྤེལ་བ།
པར་དབང་ཡོད་ཚད་ངེད་ཙོང་ཆུའི་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་བརྒྱུད་འགོད་བྱེད་མི་ཆོག
Copyright © 2010 Tsongchu.coM All rights reserved. Powered by: Tibetitw.coM
E-mail:tsongchu@tsongchu.com  QQ:1239685970 QQ:32460212  MSN:tibetan406@hotmail.com