ད་ལྟ་ཁྱེད་ཀྱི་གནས་ཡུལ་ནི། - ཙོང་ཆུའི་དྲ་བ། >> བསླབ་བྱ། >> ངན་པའི་སྤྱོད་ཚུལ་ལ་ཁྲེལ་བའི་གཏམ་ཞེས་བྱ་བ་བཞུགས་སོ།།

ངན་པའི་སྤྱོད་ཚུལ་ལ་ཁྲེལ་བའི་གཏམ་ཞེས་བྱ་བ་བཞུགས་སོ།།

[རྩོམ་གྱི་ཡོང་ཁུངས། ངེད་དྲ་བ།] [རྩོམ་པ་པོ། འགྲོ་མགོན་ཆོས་རྒྱལ་འཕགས་པ།] [ཟླ་ཚེས། 10-12-24] [ཀློག་གྲངས། ]

        འདིར་སྨྲས་པ། སྙིགས་མའི་དུས་འདིར་སྙིགས་མའི་ངང་ཚུལ་ཅན། ། སྙིགས་མའི་ལམ་ལ་ ཀུན་ནས་གཞོལ་གྱུར་པ། །དེ་དག་རྣམས་ཀྱི་བསམ་དང་སྤྱོད་པའི་ཚུལ། །སྙིགས་མར་གྱུར་པའི་ཚུལ་ཡང་འདི་ལྟར་སྣང་། །བདག་བདེ་གཞན་ཡང་བདེ་བར་འདོད་བཞིན་དུ། །བདེ་བའི་འབྱུང་གནས་བདེ་བར་གཤེགས་པ་ཡི། །གསུང་གི་མཛོད་ལ་བློ་གྲོས་མི་ འཇུག་པ། །དེ་འདྲའི་ཚུལ་ལ་ཁོ་བོས་མཚར་དུ་བརྩི། །དལ་འབྱོར་ཡོན་ཏན་ཕུན་སུམ་ཚོགས་གྱུར་ཅིང་། །དགེ་བའི་བཤེས་ཀྱིས་རྗེས་སུ་བཟུང་བཞིན་དུ། །དོན་ཆེན་མི་ བསྒྲུབ་ཕྱི་མར་སྨོན་འདེབས་པ། །དེ་འདྲའི་ཚུལ་ལ་ཁོ་བོས་མཚར་དུ་བརྩི། །བདེ་ མཆོག་བདེ་བླག་ཐོབ་བྱེད་བླ་མ་ལ། །སྐྱབས་སུ་སོང་ནས་ཉེ་བར་བསྟེན་བཞིན་དུ། ། འབད་ནས་དེ་གསུང་ལེགས་པར་མི་བསྒྲུབ་གང་། །དེ་འདྲའི་ཚུལ་ལ་ཁོ་བོས་མཚར་དུ་ བརྩི། །གང་ཞིག་སེམས་ཀྱིས་བླ་མར་གསོལ་འདེབས་བཞིན། །ལུས་དང་ངག་གིས་བྱེ་བ་ཕྲག་བརྒྱ་ཡིས། །ཉེ་བར་སྟོན་པའི་ཐུགས་སུན་འབྱིན་པ་གང་། །དེ་འདྲའི་ཚུལ་ལ་ཁོ་བོས་མཚར་དུ་བརྩི། །བརྩེ་བས་གདམས་པའི་ཚིག་གི་ཉིང་ཁུ་གང་། །ཉེ་བར་བྱིན་པའི་ཚེ་ན་མི་འཐུང་ཞིང་། །གཞན་དུ་ཇི་ལྟར་བྱ་ཞེས་འདྲི་བ་གང་། །དེ་འདྲའི་ཚུལ་ཁོ་བོས་མཚར་དུ་བརྩི། །ཡོན་ཏན་རྒྱ་མཚོར་མཆོད་པར་མི་བརྩོན་ཞིང་། །རྐང་གཉིས་དབང་པོའི་གསུང་དོན་མི་གཉེར་བར། རང་ལ་ལེགས་པར་འབྱུང་བར་རེ་བ་གང་། ། དེ་འདྲའི་ཚུལ་ལ་ཁོ་བོས་མཚར་དུ་བརྩི། །བློ་མཆོག་རྣམས་ཀྱི་རྗེས་སུ་མི་འཇུག་ཅིང་། །དམ་པའི་ངག་ལས་ངེས་པར་བརྒལ་བཞིན་དུ། །རང་གི་དོན་ཀུན་འགྲུབ་པར་རེ་བ་ གང་། །དེ་འདྲའི་ཚུལ་ལ་ཁོ་བོས་མཚར་དུ་བརྩི། །དམ་པ་རྣམས་ལ་རྟག་ཏུ་འཛུར་ ཞིང་འབྲོས། །སྐྱེ་བོ་དམན་པ་རྣམས་ལ་བག་ཕབ་ནས། །རང་གི་ཀུན་སྤྱོད་མཛེས་པར་ རེ་བ་གང་། །དེ་འདྲའི་ཚུལ་ལ་ཁོ་བོས་མཚར་དུ་བརྩི། །ཟབ་དང་རྒྱ་ཆེ་ངག་ཚིག་ བརླིང་པོ་ཅན། །བསྒོམ་བྱའི་དོན་ལ་བློ་གྲོས་མི་སྦྱོར་བར། །བསྒོམས་པ་ཙམ་གྱིས་གྲོལ་ བར་རེ་བ་གང་། །དེ་འདྲའི་ཚུལ་ལ་ཁོ་བོས་མཚར་དུ་བརྩི། །བསྒྲུབ་པར་ནུས་བཞིན་ དོན་ཆེན་མི་བསྒྲུབ་པར། །ཁོ་བོ་ལེ་ལོ་ཆེ་བས་མི་འགྲུབ་ཅེས། །སྐྱོན་ལ་ཡོན་ཏན་ བཞིན་དུ་སྙེམས་པ་གང་། །དེ་འདྲའི་ཚུལ་ལ་ཁོ་བོས་མཚར་དུ་བརྩི། །སྐྱེ་བོ་ལོག་པར་སྲེད་པའི་སྲད་བུ་ཡིས། །རྣམ་པར་བཅིངས་པས་སྐྱེ་ངན་ལ་དགའ་བ། །དེ་དག་ཚུལ་ བཞིན་སེམས་དཔའི་ཡིད་ལྡན་ཞིང་། །སྐྱེ་བོ་དམ་པའི་སྤྱོད་ལ་གཞོལ་གྱུར་ཅིག །འདི་ ཡང་འདིར་སྨོས་སྤྱོད་ཚུལ་དང་ལྡན་པ། །དུ་མའི་ངང་ཚུལ་མཐོང་བས་དེ་བཟློག་ཕྱིར། །བློ་གྲོས་དམ་པའི་རྒྱལ་མཚན་དཔལ་འཛིན་པས། །མེ་སྦྲུལ་རྒྱལ་གྱི་ཟླ་བར་སྦྱར་བ་ཡིན།། །།

དཔྱད་གཏམ།

དཔྱད་གཏམ་སྤེལ་བ།
པར་དབང་ཡོད་ཚད་ངེད་ཙོང་ཆུའི་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་བརྒྱུད་འགོད་བྱེད་མི་ཆོག
Copyright © 2010 Tsongchu.coM All rights reserved. Powered by: Tibetitw.coM
E-mail:tsongchu@tsongchu.com  QQ:1239685970 QQ:32460212  MSN:tibetan406@hotmail.com