ད་ལྟ་ཁྱེད་ཀྱི་གནས་ཡུལ་ནི། - ཙོང་ཆུའི་དྲ་བ། >> བསླབ་བྱ། >> རྗེ་རིན་པོ་ཆེ་ལ་དབེན་པའི་གནས་སུ་འགྲོ་བར་བསྐུལ་བའི་ཞལ་གདམས་བཞུགས།

རྗེ་རིན་པོ་ཆེ་ལ་དབེན་པའི་གནས་སུ་འགྲོ་བར་བསྐུལ་བའི་ཞལ་གདམས་བཞུགས།

[རྩོམ་གྱི་ཡོང་ཁུངས། ཙོང་ཆུའི་དྲ་བ།] [རྩོམ་པ་པོ། རེད་མདའ་བ་གཞོན་ནུ་བློ་གྲོས།] [ཟླ་ཚེས། 10-12-08] [ཀློག་གྲངས། ]

         ༄༅། ། གང་ལ་ཉེས་པ་རྡུལ་ཙམ་མི་མངའ་ཤིང་། །རྨད་བྱུང་ཡོན་ཏན་དཔལ་གྱི་རབ་བརྗིད་པས། ། སྙན་པའི་བ་དན་འཇིག་རྟེན་གསུམ་ན་གཡོ། ། ཐུབ་དབང་ལྷ་ཡི་ལྷ་ལ་ཕྱག་འཚལ་ལོ། ། ཀ་ཡེ་ཉོན་ཅིག་ཤེས་ལྡན་གྲོགས་པོ་དག ། བསྟན་པའི་ཉིན་བྱེད་ནུབ་རིའི་རྩེ་ལ་སོན། ། ལུས་སྲོག་གཡོ་བ་འབབ་ཆུའི་རྒྱུན་དང་མཚུངས། ། ཐར་འདོད་རྣམས་ཀྱི་བག་ཡོད་བསྟེན་པར་རིགས། ། རིན་ཆེན་བདུན་ལྡན་གླིང་ཆེན་བཞི་ལ་དབང་། ། དཔག་མེད་ཚེ་གནས་དགེ་བཅུའི་དཔལ་ལ་སྤྱོད། ། ཕུན་ཚོགས་མངོན་མཐོའི་བདེ་ལ་རོལ་བྱེད་པའི། ། འཁོར་ལོའི་སྒྱུར་རྒྱལ་དཔལ་དེའང་ཆུ་ཤིང་འདྲ། ། ལྷུན་པོའི་སྤོ་ལ་ཡུན་རིང་གནས་བཅས་ཏེ། ། ཡོངས་འདུའི་ཚལ་དུ་དགའ་བདེའི་དཔལ་གྱིས་རོལ། ། འཆི་མེད་ཉེ་དབང་ཚོགས་ཀྱིས་གུས་བཏུད་པའི། ། འཕྲོག་བྱེད་མིག་སྟོང་ལྡན་དེའང་སྲིད་པའི་བྲན། ། ལུས་སེམས་ཟུག་རྔུའི་གདུང་བ་རིང་དུ་ སྤངས། ། ཏིང་འཛིན་བདེ་བས་བསྐལ་མང་འདའ་བྱེད་པའི། ། འཇིག་རྟེན་མེས་པོ་གསེར་གྱི་མངལ་ལྡན་ཡང་། ། འཆི་མེད་གོ་འཕང་ལས་རིང་གྱི་ནང་འཁོར། ། གང་གིས་རེག་ན་རབ་བརྟན་ལྷུན་པོ་ཡང་། ། སྐད་ཅིག་ཙམ་གྱིས་ཐལ་བ་རློག་བྱེད་པའི། ། མེ་ལྕེ་ཕྲེང་བ་ལུས་ལ་རབ་འབར་བ། ། དམྱལ་བའི་ཟུག་རྔུ་སུ་ཡིས་བརྣག་པར་ནུས། ། བལྟས་པ་ཙམ་གྱིས་ཀླུང་ཆེན་རྒྱུན་སྐེམས་ཤིང་། ། ལྗོན་ཤིང་འབྲས་བུ་མེད་པར་བྱེད་པ་ཡི། ། ཏ་ལའི་ཡང་ཐོག་སྐམ་ལྟའི་ཡི་དྭགས་གཟུགས། ། གང་ཞིག་མཐོང་ན་འཇིགས་རུང་སྐྱི་ཡང་གཡའ། ། བླང་དོར་རྨོངས་པའི་གཏི་མུག་སྨག་རུམ་འཐིབ། ། གཅིག་ལ་གཅིག་ཟ་རྡོ་རྗེའི་མེ་སྟག་དང་། ། བཀོལ་སྤྱོད་ཆར་རྒྱུན་ལུས་ལ་རྟག་འབབ་པའི། ། རྣམ་མང་དུད་འགྲོའི་དུབ་པ་སུ་ཡིས་བཟོད། ། སྲིད་པའི་ཕུན་ཚོགས་དེ་ལྟར་མནོག་ཆུང་ཞིང་། ། རབ་མང་ཉེས་པའི་ཚོགས་དང་ལྡན་རིག་ནས། ། རང་གཞན་སྲིད་པའི་མཚོ་ལས་བསྒྲལ་བྱའི་ཕྱིར། ། མང་ཐོས་བདག་ནི་དབེན་པའི་གནས་སུ་འགྲོ། ། ཆར་འདོད་བྱིའུས་འབྲུག་སྒྲ་ཐོས་པ་བཞིན། ། དབེན་པའི་གཏམ་འདི་ཁོ་བོའི་སྙིང་ལ་བབས། ། ཐོས་པའི་དོན་རྣམས་དོན་ཡོད་བྱ་བའི་ཕྱིར། །གཞོན་ནུ་བློ་གྲོས་དབེན་པའི་ནགས་སུ་འགྲོ། ། ངང་པའི་ཚོགས་ཀྱིས་པད་མའི་མཚོ་མཐོང་ལྟར། ། བས་མཐའི་གནས་ལ་ ཁོ་བོ་སེམས་རབ་གཡོ། ། དལ་འབྱོར་ལུས་ལ་སྙིང་པོ་བླང་བའི་ཕྱིར། ། གཞོན་ནུ་བློ་གྲོས་དབེན་པའི་ནགས་སུ་འགྲོ། ། བུང་བ་གཞོན་ནུའི་འདབ་བརྒྱའི་ཚལ་མཐོང་ལྟར། ། ཁོ་བོའི་ཡིད་ནི་དབེན་པའི་རི་ལ་ཆགས། ། ཏིང་འཛིན་བདུད་རྩིའི་རོ་དེ་མྱོང་བྱའི་ཕྱིར། ། གཞོན་ནུ་བློ་གྲོས་དབེན་པའི་ནགས་སུ་འགྲོ། ། དཔྱིད་དུས་བསིལ་བའི་མ་ལ་ཡའི་རླུང་ལྟར། ། ནགས་ཀྱི་སྨན་ལྗོངས་ཁོ་བོའི་ཡིད་ལ་འབབ། །ཉོན་མོངས་བདུད་ཀྱི་སྡེ་དེ་གཞོམ་བྱའི་ཕྱིར། །གཞོན་ནུ་བློ་གྲོས་དབེན་པའི་གནས་སུ་འགྲོ།    །ཞེས་སོ།    ༈     ། ན་མོ་ལོ་ཀེ་ཤྭ་ར་ཡ། །གང་ལ་ཆགས་པས་རྟག་ཏུ་སྡུག་བསྔལ་ཞིང་། ། མེ་ཡི་འོབས་དང་མི་གཙང་རྫབ་ལྟ་བུའི། ། འཁོར་བ་འདི་ལ་བདེ་བའི་སྐབས་མེད་པའི། ། ཞེན་ལོག་རྒྱུན་དུ་སྟེན་ཅིག་སྒྲུབ་པ་དཔལ། ། ཉོན་མོངས་ནད་ཆེན་སེལ་བའི་སྨན་གཅིག་པུ། ། དུས་གསུམ་རྒྱལ་བ་ཀུན་གྱི་བགྲོད་གཅིག་ལམ། ། མཐའ་བྲལ་དབུ་མའི་ལམ་ལས་གཞན་མེད་ཀྱི། ། ཡེངས་མེད་སྟོང་ཉིད་སྒོམས་ཤིག་སྒྲུབ་པ་དཔལ། ། ལས་ཉོན་དབང་གི་རྒྱུད་ལྔའི་འཁོར་བ་རུ། ། དུ༔ ཁ་རྒྱུད་མར་མྱོང་བའི་འགྲོ་བ་འདི། ། ཐོག་མེད་དུས་ཀྱི་དྲིན་ཅན་མ་ཡིན་གྱི། ། སྙིང་རྗེ་རྒྱུན་དུ་སྒོམས་ཤིག་སྒྲུབ་པ་དཔལ། །མདོར་ན། འཁོར་བ་ལ་ཡིད་འབྱུང་བས་མཉམ་བཞག་ཏུ་ སྟོང་ཉིད་བསྒོམ་ཞིང་། རྗེས་ཐོབ་ཏུ་སྙིང་རྗེ་བསྒོམ་པ་ལ་ཉམས་ལེན་གྱི་གཙོ་བོ་མཛོད། ཅེས་པ་དགེ་སློང་གཞོན་ནུ་བློ་གྲོས་ཀྱིས་སྦྱར་བའོ།། །།

དཔྱད་གཏམ།

དཔྱད་གཏམ་སྤེལ་བ།
པར་དབང་ཡོད་ཚད་ངེད་ཙོང་ཆུའི་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་བརྒྱུད་འགོད་བྱེད་མི་ཆོག
Copyright © 2010 Tsongchu.coM All rights reserved. Powered by: Tibetitw.coM
E-mail:tsongchu@tsongchu.com  QQ:1239685970 QQ:32460212  MSN:tibetan406@hotmail.com